රජය මඟින් ආරම්භ කර ඇති වගා නොකළ ඉඩම්, වගා කිරීමට යෑමේදී සියලුම ගොවීන්ට ආර්ථික ශක්තියක් ලබා දෙනවා සේම ඒ තුළින් ජාතික ආර්ථිකයට විශාල ශක්තියක් ලැබීම ජනතාවගේ ජයග්‍රහණයක් බව කෘෂිකර්ම, පශු සම්පත් ඉඩම් හා වාරිමාර්ග අමාත්‍ය කේ.ඩී. ලාල්කාන්ත මහතා පවසයි.
“එක මිටට ගොවි බිමට” යන තේමාව යටතේ ලංකාවේ වගා නොකරන ලද සියලුම කෘෂිකාර්මික ඉඩම් වගා කිරීමේ ජාතික වැඩසටහන කන්තලේ සීනි කර්මාන්ත ශාලා භූමියෙන් පෙරේදා (11) ආරම්භ කරමින් අමාත්‍යවරයා එසේ පැවසීය. කර්මාන්ත ශාලා භූමියේ අක්කර 2000ක බඩඉරිඟු වගාකිරීම මේ තුළින් ආරම්භ කළ අතර අමාත්‍යවරයා යන්ත්‍රානුසාරයෙන් ගොවීන් සමඟ බඩඉරිඟු බීජ සිටුවීමේ අවස්ථාවට එක්විය.
‘පොහොසත් රටක් ලස්සන ජීවිතයක්’ යන රජයේ ප්‍රතිපත්ති ප්‍රකාශනයට සමගාමීව මෙම වැඩසටහන දිස්ත්‍රික්ක 22ක් පුරා පෙරේදා (11) ආරම්භ කෙරුණු අතර, මේ සඳහා තෝරාගෙන ඇති ඉඩම් ප්‍රමාණය අක්කර එක් ලක්ෂ දාහත් දාස් අනූපහකි (117,095).
මෙහිදී තවදුරටත් අදහස් දැක්වූ අමාත්‍ය කේ.ඩී. ලාල්කාන්ත මහතා, “එක මිටට ගොවි බිමට යන වැඩසටහනට ගොවිජන සේවා දෙපාර්තමේන්තුවට මෙවර අය වැයෙන් රුපියල් මිලියන 3500ක් වෙන් කරලා තියනවා. අපේ අය – වැය ඉදිරිපත් කරලා සම්මත කරගත්තේ මාර්තු 21 වැනිදා. ඉදිරි මාස හයකට මේ මුදල වියදම් කරන්න ඕන. මේ ව්‍යාපෘතිය යටතේ බඩඉරිඟු වගාව සඳහා පමණක් රුපියල් මිලියන 627ක් වෙන් කරලා තියනවා. මේ මුදලින් ගොවිබිම්වලට යන පාරවල් ඇළවේලි සකස් කිරීම ප්‍රතිසංස්කරණය කිරීම් සිදු වෙනවා. කන්තලේ සීනි සමාගම යටතේ ඇති මෙම භූමිය තුළ වගා කටයුතු සඳහා පමණක් රුපියල් මිලියන 10ක් වෙන් කරලා තියනවා. මේක ජාතික වැඩසටහනක්. එක ගොවියකුට බීජ මිලදී ගන්න හරි ඒ හා සම්බන්ධ වැඩවලට රජය මඟින් අක්කරයකට රුපියල් 10,000ක මුදලක් ප්‍රදානය කරනවා. සමහර ගොවීන්ට මේ වැඩේ ගැන යම් යම් ප්‍රශ්න තියෙනවා. ඒවා කතා කරලා විසඳගන්න පුළුවන්. ලංකාවේ බඩඉරිඟු අවශ්‍යතාවයෙන් භාගයක් ගෙන්නේ පිටරටින්. ඒ සඳහා ලංකාවෙන් විශාල මුදලක් පිටරටට ඇදී යනවා. අපිට භූමිය තියෙනවා නම්, ආර්ථික වශයෙන් වුවමනාව තියෙනවා නම් ජාතික ආර්ථිකය ගොඩනැඟීමේ කර්තව්‍යයට මේ ව්‍යාපෘතිය සාර්ථක කරගන්න පුළුවන්. මෙහි අස්වැන්න මිලදී ගැනීම සම්බන්ධයෙන් සැකයක් තියා ගන්න එපා. අපි ඒ ප්‍රශ්නයට විසඳුම් හොයලා ඉවරයි. මේ බඩඉරිඟු අස්වැන්න ආහාර ප්‍රවර්ධන මණ්ඩලයෙන් සාධාරණ මිලකට ගොවීන්ගෙන් මිලදී ගැනීමට සියලු කටයුතු සූදානම් කරලා තියෙන්නේ.
මීට පෙර රජයන් අපේ මේ අමාත්‍යාංශය කෑලි පහකට කඩලා ඇමැතිවරු පස්දෙනෙක් පාලනය කළා. ලේකම්වරු පස් දෙනෙක් හිටියා. දැන් එක් ඇමැති වරයෙක් හා එක් ලේකම්වරයෙක් යටතේ මේ කටයුතු ඉතා අමාරුවෙන් හරි සිද්ධ වෙනවා.” යැයි පැවැසීය.
මෙහිදී අදහස් දැක්වූ කෘෂිකර්ම හා පශුසම්පත් නියෝජ්‍ය අමාත්‍ය නාමල් කරුණාරත්න මහතා: “මේ ප්‍රදේශයේ ජනතාවට ඉඩම් ප්‍රශ්න, ජල ප්‍රශ්න තියෙනවා. අපි මේ බිමට අවස්ථා ගණනාවකදීම පය ගහලා තියනවා.
එතකොට මේ භූමිය එන්න පාරක්වත් නැතිව වල් වැදිලා තිබුණේ. වගා නොකළ ඉඩම් වගා කිරීමේ සංකල්පය යටතේ මේ ජාතික උත්සවයට සමගාමීව ලංකාවේ දිස්ත්‍රික්ක 22ක් පුරා සමාරම්භක වැඩසටහන් පැවැත්වෙනවා. අඩු භූමියක වැඩි ඵලදාව ලබාගත හැකි වන පරිදි අපගේ විද්‍යාගාර 32ක් පුරා පස් සාම්පල් පරීක්ෂා කිරීම සිදුකෙරෙනවා.”
විදේශ කටයුතු හා විදේශ රැකියා නියෝජ්‍ය අමාත්‍ය අරුන් හේමචන්ද්‍රා මහතා: “කන්තලේ සීනි කම්හල වැහුණට පස්සේ, අප රජය වත්මන් ජනාධිපතිතුමාගේ සංකල්පයකට අනුව මේ භූමියේ අක්කර11,000ක් වගාකිරීමට අනුමැතිය ලැබුණා. පළමු අදියරේ අක්කර 3300ක් ගොවීන් 1152කට ප්‍රතිලාභීන් ලෙස මෙම ඉඩම් බෙදලා දීලා තියෙනවා. මේක ලේසි කටයුත්තක් නෙමෙයි.”
මෙහිදී අක්කර 2000ක බඩඉරිඟු වගා කිරීම සඳහා තෝරාගත් ගොවීන් පිරිසකට ඉඩම්වලට ප්‍රවිෂ්ටවීමේ අවසර පත්‍ර නිකුත් කිරීම ද මෙහිදී සිදු කෙරිණි. මෙම අවස්ථාවට ත්‍රිකුණාමලය දිස්ත්‍රික් පාර්ලිමේන්තු මන්ත්‍රී රොෂාන් අක්මීමන, දිසාපති මහේෂ් හේමන්ත කුමාර, ගොවිජන සේවා අධ්‍යක්ෂ ජෙනරාල් යු.බී.රෝහණ රාජපක්ෂ යන මහත්වරු ද එක්වූහ.
ත්‍රිකුණාමලය විශේෂ – ඒ.ටී.එම්. ගුණානන්ද – දිනමිණ ඇසුරිනි
