-
වගා කළේ අක්කර භාගයක: අස්වනු නෙළීම අරඹා මාස 6ක් තුළ මේ ආදායම උපයලා
-
“භගවාන්” ඉන්දියාවේ වවන දෙළුම් ප්‍රභේදයක් මේ මගේ පළමු අස්වැන්න – උදයකුමාර්
-
ආනයනික දෙළුම්වලට දෙවැනි නොවීම ද විශේෂත්වයක්
මඩකලපුවේ චෙන්කලඩි පළවායි ප්‍රදේශයේ ප්‍රථම වරට වගා කරන ලද දෙළුම් වගාවෙන් උදයකුමාර් ගොවි මහතා රුපියල් මිලියන 3.5ක ආදායමක් උපයා ඇත.ඉන්දියාවේ වගා කෙරෙන භගවාන් නැමැති සුප්‍රකට දෙළුම් විශේෂය මෙරට වගා කිරීමෙන් මේ ආදායම් උපයා තිබේ.
කෘෂිකර්ම හා වැවිලි කර්මාන්ත අමාත්‍යාංශය යටතේ ඇති කෘෂි අංශ නවීකරණ ව්‍යාපෘතියේ තාක්ෂණික හා මුල්‍යමය සහයෝගිතාව මත කළ මේ දෙළුම් වගාව අතිශයින්ම සාර්ථක වූ බවත් දෙළුම් වගාවේ අස්වනු නෙළීම අරඹා මාස 06ක් තුළ මේ ඉහළ ආදායම උපයා ගැනීමට උදයකුමාර් ගොවි මහතාට හැකි වූ බවත් කෘෂි අංශ නවීකරණ ව්‍යාපෘතිය විසින් කෘෂිකර්ම හා වැවිලි කර්මාන්ත ඇමැති මහින්ද අමරවීර මහතාට පසුගියදා (12) දැනුම් දුන්නේය.
උදයකුමාර්ගේ දෙළුම් වගාව
මඩකලපුවේ දෙළුම් වගාවෙන් පළමු අස්වැන්නෙන් මේ මුදල උපයා ගැනීමට හැකි වී ඇති අතර තවත් වසර 20ක් පමණ මේ වගාවෙන් ආදායම් උපයා ගැනීමට හැකි වන බවත් වගාව අවසන් වන විට එක් ගොවි මහතකුට රුපියල් මිලියන 60ක් ආදායම් උපයා ගත හැකි බවත් කෘෂි අංශ නවීකරණ ව්‍යාපෘතිය ඇමැතිවරයා හමුවේ අවධාරණය කෙරිණි.
මින් පෙර කිසිදු අවස්ථාවක මඩකලපුව දිස්ත්‍රික්කයේ වගාවක් ලෙස දෙළුම් වගා කිරීමට පියවර ගෙන නැත. නමුත් මඩකලපුවේ මුහුදු සුළඟ සමඟ දෙළුම් වගා කිරීමට සුදුසු පරිසරයක් ඇති බවට තහවුරු කර ගැනීමෙන් පසුව කෘෂි අංශ නවීකරණ ව්‍යාපෘතියේ අධ්‍යක්ෂ ආචාර්ය රොහාන් විජේකෝන් මහතා විසින් චෙන්කලඩි පළවායි ප්‍රදේශයේ අක්කර 10ක නියාමන ව්‍යාපෘතියක් ලෙස දෙළුම් වගාව ආරම්භ කළේය.අධි ඝනත්ව දෙපේළි ක්‍රමයට (High Density Double Raw System) මේ වගාව කළ අතර ඊට අවශ්‍ය තාක්ෂණික හා මුල්‍යමය සහයෝගිතාව කෘෂි අංශ නවීකරණ ව්‍යාපෘතිය මගින් ලබා දුන්නේය.
මේ දෙළුම් වගාවේ ගොවීන් කීහිප දෙනෙක් අක්කර භාගයක් බැගින් වගා කරනු ලැබූ අතර අස්වනු නෙළීම මේ වනවිට සිදු කෙරේ.මේ ගොවීන් සියලු දෙනාම දෙළුම් වගාවේ අස්වනු නෙළීම අරඹා මාස 06ක් තුළ මේ වනවිට ඉහළ ආදායමක් උපයා ඇති අතර පළවායි ප්‍රදේශයේ දෙළුම් වගා කළ උදයකුමාර් මහතා මේ වනවිට රුපියල් මිලියන 3.5ක් අක්කර භාගයක දෙළුම් වගාවෙන් වැඩිම ආදායමක් උපයාගෙන තිබිම විශේෂත්වයකි.
දැනට දෙළුම් රටට අවශ්‍ය ප්‍රමාණය මෙරට නිෂ්පාදනය නොවෙන නිසා විශාල ප්‍රමාණයක් ආනයනය කරයි. ඒ සඳහා විදේශ විනිමය විශාල ප්‍රමාණයක් විදේශ රටවලට ඇදී යයි. නමුත් මේ වනවිට දෙළුම් වගාව මෙරට ශීඝ්‍රයෙන් ව්‍යාප්ත වෙමින් පැවතීම ද ඉදිරි කාලයේ මෙරටට අවශ්‍ය දෙළුම් ප්‍රමාණය මෙරටදීම නිපදවා ගැනීමට හැකි වනු ඇත.
කෘෂිකර්ම දෙපාර්තමේන්තුව විසින් හඳුන්වා දෙන ලද නව දෙළුම් ප්‍රභේද දෙකක් මලී Pink සහ ලංකා Red යනුවෙන් හඳුන්වා දී ඇති අතර මේ වනවිට එම ප්‍රභේද දෙක කල්පිටිය ප්‍රදේශයේ සාර්ථක ලෙස වගා කර ඇත. ඊට අමතරව මඩකලපුව දෙළුම් වගාව තවදුරටත් ව්‍යාප්ත කිරීම සඳහා පියවර ගන්නා ලෙස ඇමැති මහින්ද අමරවීර මහතා කෘෂි අංශ නවීකරණ ව්‍යාපෘතියට උපදෙස් දී තිබේ.ඒ අනුව මේ වනවිට තවත් ගොවීන් විසි දෙනෙක් තෝරා ගැනීමට කටයුතු යොදා ඇත.තිස්සමහාරාම ප්‍රදේශයේ පුද්ගලික අංශයේ ගොවි මහතෙක් ද දැනට සාර්ථක ලෙස දෙළුම් වගාව සිදු කරමින් පවතී.රසයෙන් හා ගුණාත්මකභාවයෙන් ඉහළ මේ දෙළුම් ආනයනික දෙළුම්වලට දෙවැනි නොවීමද විශේෂ කරුණක් බව ද කෘෂි අංශ නවීකරණ ව්‍යාපෘතිය සඳහන් කරයි.
බුද්ධිකා ඉඹුලාන – දිනමිණ ඇසුරිනි
