ශ්‍රී ලංකාවේ වාර්ෂික පොල් ආශ්‍රිත නිෂ්පාදන අපනයනය ඩොලර් මිලියන 850 සිට ඩොලර් මිලියන 2500 දක්වා වර්ධනය කර ගැනීමට පහසු අවස්ථාවක් තිබෙන බව පොල් කිරි නිෂ්පාදකයින්ගේ සංගමයේ (Coconut Milk Manufacturers’ Association – CMMA) සභාපති රන්දීව මලලසූරිය මහතා පවසයි.
රන්දීව මලලසූරිය මහතා වැඩි දුරටත් කියා සිටියේ, රට තුළ වාර්ෂික පොල් නිෂ්පාදනය දිගු කාලීනව ගෙඩි බිලියන 4.5 දක්වා වැඩිදියුණු කළ යුතු බවයි. එසේම ප්‍රති අපනයන කරනු ලබන අගය එකතු කළ පොල් ආශ්‍රිත නිෂ්පාදන සඳහා අඩු වටිනාකමක් ඇති පොල් නිෂ්පාදන ආනයනය කිරීම කෙරෙහි ද අවධානය යොමු කළ යුතු බව ඔහු වැඩි දුරටත් සඳහන් කළේය.
සැකසූ පොල් ආහාර භාවිතා කිරීමෙන් ශ්‍රී ලංකාව නැවුම් පොල් නාස්තිය අවම කළ යුතු බව ද ඔහු අවධාරණය කළේය.
ශ්‍රී ලංකාවේ පොල් කර්මාන්තයේ ආදායමෙන් 50% ක් ලැබෙන්නේ මද නිෂ්පාදනවලින් බව පැවසූ මලලසූරිය මහතා ශ්‍රී ලංකාව ලෝකයේ සිව්වන විශාලතම පොල් නිෂ්පාදකයා බව ද සඳහන් කළේය.
“නිවැරදි පිළිවෙත් ක්‍රියාත්මක කර ගත හැකි නම්, අවම වශයෙන් ඩොලර් බිලියන 2.5 ක් හෝ ඊට වැඩි මුදලක් උපයා ගැනීමට මෙම කර්මාන්තයට විශාල හැකියාවක් තිබෙනවා. ලෝක වෙළඳපොළ දෙස බලන විට, ශ්‍රී ලංකාවට තවමත් පොල් ක්ෂේත්‍රයේ හොඳ අවස්ථාවක් තිබෙනවා. පොල් ආශ්‍රිත නිෂ්පාදන අපනයන ආදායම කෙටි කාලීනව ඩොලර් බිලියන 1.5 දක්වාත් දිගු කාලීනව ඩොලර් බිලියන 2.5 දක්වා ඉහළ නැංවිය හැකි බව අපි තරයේ විශ්වාස කරනවා. මෙම කර්මාන්තයට විශාල විභවයක් තිබෙනවා. නමුත් එහි යාමට අපට අවම වශයෙන් ගෙඩි බිලියන 4.5ක් අවශ්‍යයි. කෙටිකාලීන උපාය මාර්ගයක් වන්නේ ඉන්දුනීසියාව හෝ පිලිපීනය වැනි වෙනත් රටවලින් අමුද්‍රව්‍ය කිහිපයක් ගෙන ඒමයි. එමඟින් ඔබට නැවුම් පොල් ගෙඩි හෝ අඩු අගය එකතු කළ නිෂ්පාදන ගෙනැවිත්, අගය එකතු කර අපනයනය කළ හැකියි” පොල් කිරි නිෂ්පාදකයින්ගේ සංගමයේ සභාපතිවරයා වැඩි දුරටත් පැහැදිලි කළේය.
ශ්‍රී ලංකාවේ තවමත් ගසකින් ලැබෙන අස්වැන්න ඉතා අඩු බව ඔහු ප්‍රකාශ කළ අතර, පොල් ගසකින් ලැබෙන ගෙඩි සංඛ්‍යාව වැඩි කිරීමේ අවශ්‍යතාවය ද අවධාරණය කළේය.
“අනෙක් අතට, අපි තවමත් නැවුම් ආකාරයෙන් පොල් විශාල ප්‍රමාණයක් පරිභෝජනය කරනවා. ඒ නිසා මේ නාස්තිය නැවැත්වීම සඳහා සැකසූ නිෂ්පාදන දෙස බැලිය යුතුයි”, ඔහු තවදුරටත් පැවසීය.
