ගොවිජන සංවර්ධන ක්ෂේත්‍රයේ විශිෂ්ට කාර්යසාධනය ඇගයීම, වෘත්තීය සහයෝගීතාව ශක්තිමත් කිරීම සහ ගොවි ජනතාව වෙත වඩාත් කාර්යක්ෂම හා ප්‍රතිචාරශීලී සේවාවක් සැපයීම සඳහා අවශ්‍ය නව ප්‍රවේශ පිළිබඳ අවධානය යොමු කිරීම අරමුණු කරගත් “ගොවිජන සම්මාන 2025/2026 සහ ගොවිජන සංවර්ධන නිලධාරී සමුළුව – 2026” නොවැම්බර් 10 දින පොල්ගොල්ල ජාතික සමූපකාර සංවර්ධන ආයතනයේදී පැවැත්විණි.
ගොවිජන සංවර්ධන දෙපාර්තමේන්තුව යටතේ පවතින ගොවිජන සේවා මධ්‍යස්ථාන 566ක් කාණ්ඩ තුනකට වර්ගීකරණය කර, එක් එක් කාණ්ඩය යටතේ හොඳම කාර්යසාධනයක් පෙන්නුම් කළ ගොවිජන සේවා මධ්‍යස්ථාන තෝරා ඇගයීම මෙහිදී සිදු කෙරිණි. ඒ අනුව ජාතික මට්ටමින් එක් එක් කාණ්ඩය සඳහා රන්, රිදී සහ ලෝකඩ සම්මාන පිරිනමන ලදී.
පසුගිය වසරේ ද ප්‍රථම ස්ථානය දිනාගනිමින් මෙවරද තම කාණ්ඩවල ඉහළම ලකුණු ලබාගත් ගොවිජන සේවා මධ්‍යස්ථාන දෙකක් සඳහා ප්ලැටිනම් සම්මාන පිරිනැමීම ද මෙහි විශේෂත්වයක් විය. තවද, එක් එක් කාණ්ඩයෙන් ඉහළම ලකුණු ලබාගත් මධ්‍යස්ථාන 10 බැගින් තෝරා කුසලතා සම්මාන පිරිනැමීමද සිදු කෙරිණි.
මෙම වසරේ පැවති ජාතික ඵලදායිතා සම්මාන උළෙලේදී ඇගයීමට ලක්වූ ගොවිජන සංවර්ධන දෙපාර්තමේන්තුවේ දිස්ත්‍රික් කාර්යාල සහ ගොවිජන සේවා මධ්‍යස්ථාන ද මෙම අවස්ථාවේදී විශේෂ ඇගයීමකට ලක් කෙරිණි.
“අනාගතය වෙනුවෙන් ගොවිතැන: ගොවිජන සේවා මධ්‍යස්ථාන ග්‍රාමීය නවෝත්පාදන මධ්‍යස්ථාන බවට පරිවර්තනය කිරීම” යන තේමාව යටතේ පැවති මෙම වැඩසටහන මඟින් ගොවිජන සේවා මධ්‍යස්ථාන සාම්ප්‍රදායික සේවා සැපයීමේ ස්ථාන ලෙස පමණක් නොව, නවෝත්පාදනය, දැනුම හුවමාරුව, තාක්ෂණයෙන් සවිබල ගැන්වූ සේවා සැපයීම සහ පාර්ශ්වකරුවන් අතර සම්බන්ධීකරණය සඳහා දායක වන මධ්‍යස්ථාන ලෙස තවදුරටත් ශක්තිමත් කිරීම පිළිබඳ අවධානය යොමු කෙරිණි.
ගොවිජන සංවර්ධන නිලධාරී සමුළුව මඟින් ක්ෂේත්‍රයේ වෘත්තීය අත්දැකීම් හුවමාරු කරගැනීම, මතුවන අභියෝග පිළිබඳ අවධානය යොමු කිරීම සහ ගොවි ජනතාවට ලබාදෙන සේවාවන්හි කාර්යක්ෂමතාව, ප්‍රවේශවීමේ පහසුව සහ ප්‍රතිඵලදායකත්වය වැඩිදියුණු කළ හැකි නව ප්‍රවේශ පිළිබඳ අවධානය යොමු කිරීමට ද අවස්ථාව සලසා දෙන ලදී. ඒ අනුව, මෙවැනි ඇගයීම් සහ වෘත්තීය හුවමාරු ඔස්සේ ගොවි ජනතාව සමඟ සෘජුව සම්බන්ධ වන ගොවිජන සේවා පද්ධතිය වඩාත් කාර්යක්ෂම, තාක්ෂණයෙන් සවිබල ගැන්වූ සහ ජනතා අවශ්‍යතාවලට ප්‍රතිචාර දක්වන සේවා පද්ධතියක් ලෙස ශක්තිමත් කිරීම කෙරෙහි ආයතනික අවධානය යොමු කෙරිණි.
මෙම අවස්ථාවට ප්‍රධාන ආරාධිත අමුත්තා ලෙස කෘෂිකර්ම, පශු සම්පත්, ඉඩම් හා වාරිමාර්ග අමාත්‍ය කේ. ඩී. ලාල් කාන්ත මැතිතුමා සහභාගි වූ අතර, කෘෂිකර්ම සහ පශු සම්පත් නියෝජ්‍ය අමාත්‍ය නාමල් කරුණාරත්න මැතිතුමා ද සහභාගි විය. ගොවිජන සංවර්ධන කොමසාරිස් ජනරාල්, ධම්මික රණතුංග මහතා ප්‍රමුඛ දෙපාර්තමේන්තු නිලධාරීන්, හිටපු ගොවිජන සංවර්ධන කොමසාරිස් ජනරාල්වරුන් සහ සම්භාවනීය අමුත්තන් රැසක් ද මෙම අවස්ථාවට එක්ව සිටියහ.
මෙම වැඩසටහන සහ ගොවිජන සංවර්ධන දෙපාර්තමේන්තුවේ සේවාවන් පිළිබඳ වැඩිදුර තොරතුරු ලබාගැනීමට ජනතාවට ගොවිජන සංවර්ධන දෙපාර්තමේන්තුව අමතා වැඩිදුර තොරතුරු ලබාගත හැක.
ගොවිජන සංවර්ධන දෙපාර්තමේන්තුව
වැඩිදුර තොරතුරු සඳහා: 011 269 4231 / 011 269 4232 / 011 269 4233 / 011 269 4234
