මහර ගොවිජන සේවා බල ප්‍රෙද්ශයට අයත් කිරිල්ලවල, ඉඳිගහමුල, වෑබඩ සහ ගෝනහේන යන ප්‍රදේශ ආශ්‍රිතව ශීඝ්‍රයෙන් ඉත්තෑවන් බෝ වීම හේතුවෙන් ප්‍රදේශය ආශ්‍රිතව වගා කර ඇති පොල් පැළ, අල, බතල ඇතුළු විවිධ භෝග වර්ග ඉත්තෑවන්ගෙන් බේරාගැනීමට නොහැකි වීමෙන් ප්‍රදේශවාසීහු විවිධ ගැටලුවලට මුහුණ පා සිටිති.
මේ වන විට මෙම ඉත්තෑවන්ගේ ගහනය ශීඝ්‍රයෙන් වැඩි වීමත් සමඟම ප්‍රදේශයේ විවිධ පුද්ගලයන් විසින් එම ඉත්තෑවන් මර මස් වැඩි මිලට විකිණීමේ ජාවාරමක් ද සිදු කරන බව ප්‍රදේශවාසීහු පෙන්වා දෙති. මුල් කාලයේ කැලෑබද ප්‍රදේශවල වාසය කළ ඉත්තෑවන් මේ වන විට ජනාකීර්ණ ප්‍රදේශ දක්වා ශීඝ්‍රයෙන් වර්ධනය වී ඇති බැවින් දිනපතාම නිවාස ආශ්‍රිත ප්‍රදේශවලට ඇතුළු වන ඉත්තෑවන් ගෙවතු වගා බිම් විනාශ කිරීම හේතුවෙන් ප්‍රදේශවාසීහු දැඩි පීඩාවට ලක්ව ඇතැයි ද ඔවුහු පෙන්වා දෙති.
ඒ අනුව මහර ආසනයට අයත් කිරිල්ලවල, ඉඳිගහමුල, වෑබඩ, ගෝනහේන යන ප්‍රදේශ ආශ්‍රිතව බෝ වී ඇති ඉත්තෑවන් අල්ලා සුදුසු අභයභූමි වෙත මුදාහරින ලෙසට ඔවුහු අදාළ අංශවලින් වැඩිදුරටත් ඉල්ලා සිටිති.
